Etorkizuna dantza taldeak antolatutako X. Umeen Euskal Jaia ospatu dute.

Kolorez eta alaitasunez bete dira gaur [apirilak 13] Lekeitioko kaleak. Etorkizuna dantza taldeak antolatuta X.Umeen Euskal Jaia ospatu da, eta goizetik arratsaldera arte, Lekeitioko Etorkizuna, Amorotoko Arta Nagusi, Markina-Xemeingo Zerutxu, Erandioko Goialde, Ermuko Txindurri eta Basauriko Edurre dantza taldeetako ume eta gazteek euskal dantzen erakustaldia eskaini dute. Ia 250 dantzari batu ditu gaurko jaialdiak.

Dantzarien bilkurak ireki du 11:00etan eguneko egitaraua, eta 12:00ak puntuan irten dira dantzariak eta arduradunak Ateatik Talarantz, Itxaropena taldeko txistulariekin lagundutako kalejiran. Lehen geldialdia Talan egin dute, eta jendetza bildu da bertan gazteen dantza saioak ikusteko. Agintariena, Bizkaiko Arku Dantza eta umeen korroak dantzatu dituzte besteak beste.

Talatik plazara abiatu dira dantzariak bigarren alardea eskaintzeko. Sardinerak eta Gorulari dantzatu dituzte dotore, plaza bete jenderen aurrean. Gero, umeak bazkaltzera joan dira herriko etxe, taberna eta elkarteetara. 17:00etatik aurrera jarraitu du festa giroak plazan, erromeriagaz.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

https://lea-artibaietamutriku.hitza.eus/2019/04/13/dantzari-gazteen-plaz...