Euskal Herriko lehenengo Gazteen Dantza Topaketa antolatu du Euskal Dantzarien Biltzarrak. Araian (Asparrena, Araba) izan da topaketa ekainaren 30etik uztailaren 2ra bitartean, eta guztira Euskal Herri osoko 116 dantzari batu dira, 15 eta 25 urte bitartekoak.

Bizkaitik 90 dantzari bertaratu ziren, eta besteak beste, Hego Uribe eskualdeko bi dantza taldetako gazteak bertaratu ziren topaketara: Edurreko (Basauri) 16 eta Etorkiko (Ugao) 7. Aipatzekoa da, Bizkaiko dantza taldeetatik dantzari gehien eraman zituena izan zela Edurre.

Nortasuna, ezaugarri

“Euskal Herriko hainbat lurraldetako dantzari gazteek aukera izan dute dantzari gisa betetzen duten paperaz ozen hausnartzeko. Hausnarketa hau elkarrekin egin dute, zaletasun bat ez ezik nortasun ezaugarri bat ere partekatzen duten dantzariek”, diote Euskal Dantzarien Biltzarretik: “Dinamiketan zehar, euskal kultura transmititzeko beren zeregina integratuta dutela azaleratu da: harro daude dantzari izateaz eta euskal ondare kulturaleko kide izateaz”.

https://geuria.eus/herriak/hego-uribe/hego-uribe-gazteen-dantza-topaketa...