XLIX Euskal Herriko Dantza Agerketa 2021

Euskal Herriko Dantza Agerketa 2021

2021eko irailaren 18an eta 19 an, larunbat eta igandean, BASAURIko SOCIAL Antzokian, iluntzeko 19:00 etan .

‘Euskal Herriko Dantza Agerketa’k aurrera jarraitzen du 2021 urte honetan, larunbatean bost talde autoktonoren presentzia berreskuratuz eta Basauriko hiru taldeena igandean

  • 2021eko egoera berezia dela eta, ‘Euskal Herriko Dantza Agerketa’ren 49. edizioa SOCIAL Antzokian egingo da, irailaren 18an, larunbata, eta 19an, igandea, gaur egun indarrean dauden osasun-arauak eta segurtasun-neurriak errespetatuz.
  • Aurten, Euskal Herriko herrialde ezberdinetako talde autoktonoen parte-hartzea berreskuratuko da larunbatean, hilak 18, eta Basauriko hiru dantza-taldeen emanaldia igandean, hilak 19, biak ere 19:00etan.
  • Bi saioetarako sarrerak -doakoak- Basauriko SOCIAL Antzokiko leihatilan bertan egongo dira eskuragarri irailaren 11tik aurrera, ohiko ordutegian.
  • Pandemiaren aurreko formatua berreskuratuko da eta, antzokian bertatik bertara ikusteko aukera izango duten 330 pertsonez gain, 'Euskal Herriko Dantza Agerketa 2021' berriro ere Interneten ikusi ahal izango da zuzenean, 'streaming' bidez, gure "Youtube"ko kanalean:

https://youtu.be/_6WfGp8syFE

  • Aurtengo edizioan honako dantza-talde hauek izango ditugu: San Lorentzo (Berriz, Bizkaia), Guardia-Biasteriko Dantza Taldea (Araba), Aurtzaka (Beasain, Gipuzkoa), Barde Ribera (Fustiñana, Nafarroa) eta Atharratzeko dantzariak (Atharratze, Zuberoa).
  • Aurten ere, Etor Basabek ekitaldiaren kartelen bilduma bat diseinatu du, edizio honetako bost taldeetako bakoitza irudikatuz.

Basauri, 2021eko irailaren 10a.- 2021 urte hau oraindik ere desberdina da gure bizitzako alderdi gehienetan, baina, hain zuzen ere, horregatik, 'EUSKAL HERRIKO DANTZA AGERKETA'ren Antolaketa Batzordeko kideok ohiko jarduerak berreskuratu nahi izan ditugu, ahal direnak behintzat. Horregatik, aurtengo edizioan -berrogeita bederatzigarrena- berriro ere Euskal Herri osoko talde autoktonoak izango ditugu larunbateko saioan, baita Basauriko hiru dantza-taldeen emanaldia ere igandean (Agintzari, Basauritar eta Edurre dantza-taldeak). Ekitaldi biak Basauriko Social Antzokian izango dira, biak ere iluntzeko 19:00etan. Gaur egun, 330 lagunentzako lekua dago baimenduta.

mapaGuk uste dugu urtez urte jarraitzen digun publiko fidela ezin dugula utzi “Dantza Agerketa” gabe, Euskal Herrian ekitaldi bakarra baita non zazpi herrialdeetako dantza autoktonoak erakusten diren, beti ere bertako dantzariek dantzatuta.Era berean,dantza talde horiek euskal folklorearen sustraiak zaintzeko eta bere horretan mantentzeko egiten duten lana ere aitortu nahi dugu.

Iaz esan bezala, norberaren osasuna eta osasun publikoa ere zaindu behar direla uste dugu. Horregatik, EHDAren XLIX. edizioa egin egingo da, baina aurten ere beste era batera. Irailaren 18an eta 19an izango da, larunbat eta igandean, 19:00etan Social Antzokian. Baimendutako gehieneko kopurua errespetatu beharko da (330 gaur egun), baita maskarak nahitaez erabiltzea, gutxieneko segurtasun-tartea eta gomendatutako neurri guztiak ere. Bi saioetarako sarrerak –doakoak– Basauriko SOCIAL Antzokiko leihatilan bertan egongo dira eskuragarri irailaren 11tik aurrera, ohiko ordutegian.

Aurtengo edizioan –datorren urtean hain berezia izango den 50. edizioaren bezperan–, honako dantza-talde hauek izango ditugu Basaurin: San Lorentzo (Berriz, Bizkaia), Guardia-Biasteriko dantza-taldea (Araba), Aurtzaka (Beasain, Gipuzkoa), Barde Ribera (Fustiñana, Nafarroa) eta Atharratzeko Dantzariak (Atharratze, Zuberoa). Taldeak beraien musikariekin datoz eta, dantzak eman bitartean, aurreko urteetan izan duten argiztapen eta irudi laguntza ere izango dute, baita 2jatorrizko herrietako irudien proiekzioa ere. Ohiko aurkezpen elebidunak ere ez dira faltako ikusleak gidatzeko eta ikuskizunaz gehiago gozatzen laguntzeko.

Hala eta guztiz ere, egoera ikusita eta segurtasun arrazoiak direla medio, aurten ez da herri erromeriarik egingo aurreko ostiralean, eta kalejirarik ere ez da izango larunbateko saioa hasi aurretik.

ZUZENEKO EMANALDI OSOA “STREAMING” BIDEZ

QRJakin badakigu, gaur egungo egoera hau dela eta, pertsona batzuentzat zaila izango dela larunbat iluntzean Social antzokira joatea –sarrera, beti
bezala, doan izango da, aldez aurretik antzokiko leihatilan jasota–. Horregatik, EHDAren antolatzaileok larunbateko ikuskizuna internet-en
zuzenean ematearen alde egin dugu eta emanaldi osoa ‘streaming’ bidez ikusi ahal izango da gure "Youtube"ko kanaleko esteka honetan:
https://youtu.be/_6WfGp8syFE

Estekan errazago sartzeko, QR kode bat sortu da. Kode hori kartelean dago eta WhatsApp, gonbidapenak eta sare sozialak erabiliz zabalduko da.
Era berean, talde autoktonoek euren herrietatik ikus dezaten ere erraztu nahi da, bai eta sare sozialen bidez #DantzaAgerketa hashtag-arekin zuzenean elkarreragiteko aukera ere izan dezaten.

Bai zuzeneko emanaldia bai bideo historikoen muntaia ERREKA ikus-entzunezko kooperatibaren esku daude, berori izan baita azken urteotan EHDA grabatzeko ardura izan duena.

‘EUSKAL HERRIKO DANTZA AGERKETA’

Euskal Herriko Dantza Agerketaren ezaugarri nagusia honako hau da: dantza-talde autoktonoek soilik hartzen dute parte. Horrela deitzen zaie beren herrietako edota eskualdeetako dantzak gorde dituzten taldeei. Talde autoktonoek bertakoentzat esanguratsuak diren egunetan egiten dituzte dantzak (herriko jaiak, inauteriak, etab.). Beraz, Basaurin erakusten diren hainbat dantza jatorrizko lekuetan eta egun berezietan soilik ikus daitezke. Hala ere, jatorrizko herrietan dantza egiteari utzi baldin badiote, dantza horiek egiten dituzten taldeak ere gonbidatu izan ditugu inoiz edo behin.

Euskal Herriko Dantza Agerketa duela 49 urte sortu zen euskal folklorea bere horretan mantentzen duten taldeak suspertzeko eta ezagutzera emateko asmoz. Horrela, aukera paregabea da beroriek ezagutzeko egun horietan haien herrietara joan beharrik gabe. Gaur egun, ikuskizun honetan parte hartzea pizgarria da talde askorentzat, harrotasunerako arrazoi bat, egindako lana aitortu egiten zaiela ikusten dutelako.

Gainera, emanaldi horien grabazioak Basauriko udalerriko artxibo grafikoari eta, oro har, euskal kulturari egindako ekarpena da; izan ere, bideo horiei esker zenbait dantza berreskuratu eta ikasi ahal izan dira, bai eta janzkera batzuk berrikusi ere.

BASAURIKO DANTZA TALDEAK

Urteetako ibilbidea dela eta, ‘Euskal Herriko Dantza Agerketa’ folklore tradizionalaren erreferentzia-gune bihurtu da. EH Dantza Agerketak 49 edizio bete izana eta talde autoktonoen erakusleiho gisa mantentzea pozgarria da bai Basauriko herriarentzat eta bai antolatzen ari diren herriko taldeentzat, Agintzari, Basauritar eta Edurre. Hori dela eta, herriko hiru dantza-taldeek –Agintzari, Basauritar eta Edurrek– berriz ekingo diote dantzari aurtengo EHDAn. Ekitaldi hori ere Social Antzokian izango da. Musika aldetik Danbolin taldeko txistularien eta Bizkaiko Gaiteroen laguntza izango dute.

Esan bezala, herriko dantza-taldeek igandean, irailak 19, egingo dute euren dantza emanaldia Social Antzokian iluntzeko 19:00etan. Sarrera doan izango da sarrerak aldez aurretik leihatilan jasota.

ANTOLAKUNTZARI BURUZKO DATUAK

Euskal Herriko Dantza Agerketa Basauriko dantza-taldeek modu altruistan antolatutako ikuskizuna da, Basauriko Udalaren eta Bizkaiko Foru Aldundiaren babes eta diru-laguntzaz. Horrez gain, BBK, Social Antzokia, Starlan eta herriko zenbait erakunderen laguntza ere jasotzen da (txokoak, Herriko Taldeak, Danbolin Txistulari Elkartea, Sustraiak, San Jose eta Bizkotxalde Ikastetxeak...), baita Bizkaiko Dantzarien Biltzarrarena ere. Ekitaldiaren antolakuntza-lanetan, orotara, 100 boluntario baino gehiago aritzen dira. Gaur egungo baldintzek programa aldatzera eta murriztera behartu gaituzten arren, pertsona eta kolektibo horiei guztiei gure esker ona adierazten jarraitu nahi dugu eta hurrengo
edizioetan ere gurekin izatea espero dugu.

Laguntza guztien artean berriz ere nabarmendu nahi dugu Etor Basabe Basauriko diseinatzaile eta irudigilearena, bera baita urtero-urtero, duela hamar urte baino gehiagotik hona, edizio bakoitzeko horma-irudiak eta esku-programak diseinatzen dituena. Marrazkiotan larunbatean bertaratuko diren dantza-talde autoktonoak irudikatzen ditu.

Bereak dira, halaber, 'ikono' gisa 'Euskal Herriko Dantza Agerketa'rekin batera agertzen diren 'dantzariak', baita prentsa-ohar honek goiburuan duen logotipoa ere, urtero antolakuntzaren agiri guztietan agertzen dena.

Larunbata, Iraila 18, 2021 - 19:00