Larunbatean igel eta tute txapelketekin jaiei hasiera emango badiete ere, igandean pilatuko dira ekimen gehienak Foruko San Martinetan. Berritasun nagusia Urdaibai Dantza Taldeak, Foruko Udalak eta Gernika-Lumoko Ibilaldiak antolatutako Dantzari Txikien Jaia izango da, herriko eta Basurtu, Ordizia, Galdakao, Basauri eta Busturiko dantzari gazteekin. 11:00etan batu ostean, zelaiko karpan egingo dute emanaldia 12:45ean. Bitartean, karakol gisatuen txapelketa ere izango da. 11:00etan eman beharko da izena, kazuelak 14:00etarako aurkezteko.
Arratsaldean ekimenak hiru gunetan sakabanatuko dira: alde batetik, txikienek erromeria eta ipuin kontalariarekin gozatu ahal izango dute karpan; mus txapelketa izango da Urdaibai tabernan; eta plazan, idi probak jokatuko dira.
Azkenik, San Martin egunean, astelehenean, meza ez ezik, salda eta odolosteak banatuko zaizkie elizpera hurreratzen direnei, eta arratsaldeko 17:30etik aurrera briska txapelketa jokatuko da.
http://www.deia.com/2013/11/08/bizkaia/costa/dantzari-txikien-jaia-izang...