Deia.eus Bilbao | 03·10·24 | 06:30 

Sestaoko Udaleko Euskara sailak eta Euskal Jaiaren Batzordea osatzen duten elkarteek egitarau zabala prestatu dute asteburu honetan, urriaren 4tik 6ra bitartean konkretuki, ospatuko den Euskal Jaiaz gozatzeko. Aurten, jaialdi honen 25. urteurrena ospatuko da.

Aurtengo Euskal Jaiak herritarrentzat erakargarri izan daitezkeen berrikuntza garrantzitsuak dakartza. Agian, horien artean nabarmenena izango da aurten Euskal Ezkontzarik ez egotea, Euskal Jaiaren programazioan protagonismo handia zuelako eta programazioaren gainontzeko osagaiak itzaltzen zituela ematen zuelako. Horregatik, jai-giroa asteburu osora hedatu nahi duen formatu dibertsifikatuago baten aldeko apustua egin da aurten.

Ostiral arratsaldean ekitaldien egitarauaren hasiera izango dira haurrei zuzendutako bi ekintza: film baten proiekzioa Gaztelekun eta Kasko Plazan egingo den tailerra. San Pedro plazan, 19:00etan, Luis Pastor eta Jon Maiak euskarazko eta gaztelerako abestiek osatutako kontzertua eskainiko dute elkarrekin, Estatuko hainbat tokitatik Sestaora bizitzera iritsi eta euskaldundu diren etorkinen omenez. Ostiraleko ekitaldiei amaiera emateko, Sestao Kantari taldeak herriko hainbat txokotara eramango du bere kantu-kalejira.

Larunbat eguerdian, euskal kultura zaindu eta sustatzea helburu duten hainbat elkartek ikuskizun bateratua eskainiko dute Sestaoko kaleetan. San Pedro plazan batuko diren bi zutabetan banatuta egingo dute. Lehenengo zutabea Eusko Lorak dantza taldeak eta Gaztetxuak taldeko txistulariek osatuko dute. Bigarren zutabea Juan Ellacuria Udal Egoitzatik abiatuko da eta Salleko eta Arriskugarri dantza taldeek, erraldoiek eta hainbat musikarik osatuko dute. Bi zutabeak San Pedro plazan daudenean, jaiak aurrera jarraituko du Enrike eta Benito Txabarriko trikitilariekin, Ion Barrocal eta Arrate Illaro bertsolariekin eta Aritza Bergara idazlearekin.

Arratsaldeko hiruretatik aurrera indarberritzeko, parte-hartzaileek herri bazkaria egingo dute Kasko plazan. Larunbatari amaiera emateko, haurrentzako antzerki emanaldi bat egingo da 18:00etan San Pedro plazan; eta, ondoren, Jaire taldeak erromeria eskainiko du 19:30ean.

Igandean, Euskal Jaiari amaiera emango diote nekazaritza azokak, Inaxio Perurenaren herri kirol erakustaldiak eta haurrei zuzendutako talo tailerrak. Hori guztia 11:00etatik aurrera izango da Kasko plazan. Aurreko horiez gain, 11:30etik aurrera, Gaztetxuak txistulari taldeak kalejira egingo du herriko hainbat gunetan.​

https://www.deia.eus/bizkaia/2024/10/03/sestaok-euskal-jaia-ospatuko-du-...